MAYNILA —Isa ang Pinoy singer na si Jake Zyrus sa mga bibida sa action-drama Japanese movie na "Yaru Onna" (She’s a Killer).

Watch more in iWantv or TFC.tv

“I play the role of Akira, parang best friend ako nung bida na si Aiko, played by Kang Ji-Young. Kamay niya ako. Isa siyang assassin tapos ako 'yung tumutulong sa kanya na maghanap ng next target niya,” kuwento ni Jake sa ABS-CBN News.

Dagdag pa niya, personal ang naging pagpili sa kanya ng Japanese producers para gampanan ang isa sa mahalagang papel sa pelikula.

“They (Japanese producers) handpicked me for the role. Last year (2017) nag-start kami mag shoot. Kaya sa movie, maliit pa ang boses ko, before the transition 'yun, and ako din po ang kumanta ng theme song,” pagmamalaki niya.

Ayon pa sa kanya, naging maganda din daw ang kanyang working experience kasama ang mga Japanese filmmakers.

“We were there for two weeks and half. Sobrang gaan po nila ka-trabaho, sobrang mahinanon and nakakatuwa pa akala nila nag-transition na ako noong andoon na ako and they’re very respectful about it,” ani Jake.

“Nakakatuwa din po kasi pati credits, from Charice Pempengco to Jake Zyrus, pinalitan din nila talaga and they’ve been supportive about it,” pahayag pa niya.

Oktubre 27 ngayong taon, ipalalabas sa Japan ang pelikula, pero hindi pa tiyak kung maipalalabas din ito dito sa Pilipinas.

Bukod sa pelikula, isang album din ang kasalukuyan na ginagawa ni Jake at inaasahan na mailalabas bago magtapos ang 2018.