MANILA -- Ang dapat sana'y masayang family bonding ay nauwi sa trahedya matapos bombahin ang sinehan at malagay sa alanganin ang buhay ni Onyok (Simon Pineda).

Bagama't naging masaya ang pa-blowout ni Cardo (Coco Martin) matapos siyang ma-promote sa pagiging Senior Police Officer 2, muli na namang nailagay sa kapahamakan ang kanyang pamilya.

Pinasabog ni Congressman Subito (John Regala) ang isang sinehan upang ilihis ang atensyon ng pulisya sa mga drug-related killings sa kanyang baluarte. Kilala sa pagiging drug protektor, bumuo si Subito ng isang grupong magtatanim ng bomba sa iba't ibang parte ng Maynila.

Nagtagumpay man sa kanyang plano, maraming inosenteng buhay ang nalagay sa peligro, kasama na rito ang pamilya ni Cardo at ang kanyang anak-anakang si Onyok na kasalukuyang nasa kritikal na kundisyon.

(BASAHIN: War on drugs, tatalakayin sa 'Ang Probinsyano')