MAYNILA -- Ikinalungkot ni Vice Ganda ang pagsasara ng ilang comedy bars tulad ng Zirkoh at Klownz ni Allan K.

Naibahagi ni Vice ang kanyang saloobin sa "It's Showtime" nitong Huwebes nang may makausap na isang kalahok na nagtatrabaho sa isang comedy bar sa bansa.

"Alam mo talaga nakakalungkot sa sitwasyon ngayon, walang choice ang mga comedy bar kung hindi magsara. 'Yung Zirkoh, 'yung Klownz nagsara na, 'yung Punchline at Laffline nagsara na. Ang daming komedyante ang nawaalan ng trabaho," ani Vice.

"At saka 'yung legacy ng comedy bar, parang 'di ko ma-imagine na mawala na totally ang comedy bar sa lipunan," dagdag ni Vice na sa comedy bar nahasa ang talento pagdating sa komedya.

Sa gitna ng krisis, ibinahagi ni Vice ang kabutihang ginagawa ng mga komedyante na ang iba ay patuloy na nagbibigay saya online.

"Mayroon silang mga nakokolekta na mga donation pero hinahati-hati nila 'yon para maitulong sa staff ng comedy bar, 'yung mga waiter, 'yung nasa valet, 'yung mga cook. Kasi 'yan, lahat 'yan ay wala na. Wala naman silang mga online show kaya yung mga bakla tumutulong para mabigyan nila ng ayuda ang ibang staff," ani Vice.