Watch more in iWantv or TFC.tv

MANILA -- Bumuhos ang luha ng aktres na si Arci Muñoz sa pag-alala sa kanyang yumaong ama.

Sa "Magandang Buhay" nitong Biyernes, hindi na napigilan ni Arci ang maiyak habang ibinabahagi na mas naging matatag ang kanilang pamilya nang mawala ang kanyang ama.

"Gusto ko lang walang magbago even now that he's gone. Gusto ko walang magbabago sa family. Gusto ko strong pa rin kami all together," aniya.

Matatandaang sumakabilang-buhay ang ama ni Arci na si Manuel Ramon Muñoz noong Pebrero 2016.

Pag-amin ni Arci, kahit tatlong taon na ang nakalilipas ay hindi pa rin nawawala ang sakit ng pagkawala ng kanyang ama.

"Three years na but 'yung feeling po talaga, hindi nawawala. Every week ako nagsisimba sa columbarium kung nasaan siya. Every week, pinupuntahan ko siya. Pero every week pa rin ako umiiyak," aniya.

Dagdag ng aktres: "Alam mo 'yon? Sabi ko, bakit ganun pa rin? Kahit every day... hindi pa rin nawawala talaga [ang sakit]. Everything, lalo na 'yung luto niya, lahat-lahat. Kasi kung ano ako ngayon, he's a really huge part of that. Talagang I miss him every single day."

Sa kabila ng sakit, kumakapit si Arci sa pananampalataya niya sa Diyos para matanggap ang nangyari sa kanyang ama.

"'Yung very strong spiritual relationship ko with God, that keeps me very strong, na mag-continue also to do what I love. Kasi there was a time na sabi ko, kapag nawala si Papa, ayaw ko na talaga... Kaya nga ayaw kong tumanda, ayaw kong umabot sa age na... Gusto ko mauuna ako. It's so hard," aniya.