DUBAI - Nakakabinging tilian ng Pinoy fans sa Dubai ang sumalubong sa Kapamilya star na si Carlo Aquino nang mag-perform siya sa World Trade Center na inorganisa ng Kalayaan 2022.

Inabangan ng mga dumalo sa selebrasyon ng ika-124 Araw ng Kalayaan ng Pilipinas ang mini-concert ni Carlo. Patok sa pakilig ang mga kanta ni Carlo.

Dinudumog siya sa bawat lapit niya sa fans. Puno ang venue kaya mas lalong ginanahan si Carlo sa bawat performance nya.

Wan-to-sawa naman sa kaka-selfie ang fans ni Carlo at hindi pa nagpapigil ang iba, sumunod pa sa backstage para muling makita ang idolo.

Si Ryz Mendoza na bumiyahe pa galing Sharjah ay tuwang-tuwa ng mapanood ang performance ni Carlo. “Ang gwapo ni Carlo! Idol,” sabi ni Mendoza.

Cool na cool pa ring humarap sa TFC News si Carlo matapos ang kanyang performance.

“Inenjoy ko lang at yung makita ko sila, mga kababayan natin na nag-enjoy din, na masaya sila (ngayong) Independence Day, tapos sama-sama tayong mga Pilipino na sine-celebrate yung Independence Day sa ibang bansa, sobrang big deal yun,” sabi ni Carlo.

Para sa mga nagbabagang mga balita tungkol sa ating mga kababayan sa Gitnang Silangan, Europa, Africa at tumutok sa TFC News sa TV Patrol.