MAYNILA -- Sa bihirang pagkakataon, naging emosyonal ang komedyanteng si Bayani Agbayani dahil sa mensahe na natanggap mula sa kanyang anak.

Sa "Magandang Buhay" nitong Martes, hindi napigil ni Bayani ang lumuha habang binabasa ang pasasalamat ng kanyang panganay na si Thalia Rogacion.

Si Thalia ang unang anak ni Bayani na nagbigay sa kanya ng apo.

Watch more in iWantv or TFC.tv

Sa sulat, iginiit ni Thalia ang pasasalamat sa komedyante bilang isang mabuting ama.

Bilang reaksiyon sa sulat ng anak, sinabi ni Bayani: "Alam mo napakasuwerte ko sa mga anak ko kasi napakagagalang, napakatatalino, napakababait. Alam niyo mga anak, ipagpatuloy niyo lang ang pagmamahal sa inyong mga magulang. Kahit sinong mga anak, kasi 'yan po ay ang sekreto ng buhay... Huwag kayong mag-isip ng tagumpay para sa sarili niyo, mag-isip kayo ng tagumpay para sa mga mahal niyo sa buhay. Walang pangarap na hindi ipagkakagloob ng Diyos para sa inyo."

Sa ngayon ay labis ang kasiyahan ni Bayani bilang isang lolo.

Nitong Abril 22, isinilang ang kanyang apo na si Santiago Vito, ang anak ni Thalia sa kapatid ng aktres na si Bea Alonzo na si James.

"Ang pinakanakakatuwa ay lalaki kaagad. Apat na babae (ang anak ko). Ang kapatid ko anim na babae. Ang asawa ko babae, of course, puro babae ang nasa bahay namin. Ngayon lang ako magkakaroon ng kasamang lalaki," ani Bayani.

Malaki ang pasasalamat ni Bayani na naging maayos ang panganganak ni Thalia at malusog ang kanyang apo na ngayon ay nasa Iba, Zambales sa isang bukirin na pag-aari ni Bea.

"Lahat sila safe, nasa farm sila ni Bea. Ang ganda ng lugar nila," ani Bayani na ibinahagi rin ang pasasalamat kay Bea.

"Nagpapasalamat ako sa panginoong Diyos na iniayon ang buhay ni Thalia ang mapapangasawa niya ay mula sa napakabuting pamilya," ani Bayani.