Buhay ni 'Manoy' sinariwa, binigyang pugay sa kaniyang lamay

Anjo Bagaoisan, ABS-CBN News

Posted at Jun 22 2019 03:17 PM | Updated as of Jun 22 2019 07:31 PM

Magtatagal hanggang Hunyo 23 ang lamay ni Eddie Garcia. Screengrab

MAYNILA – Kahit nagluluksa, pawang masasayang kuwento pa rin ang inalala ng mga naging katrabaho ni Eddie Garcia sa kaniyang lamay sa Heritage Park noong Biyernes ng gabi. 

Iba't ibang henerasyon ng mga taga-industriya ang nagsama-sama para sa pag-alala sa batikang aktor, na walang inurungang pagganap sa 7 dekada niya sa showbiz. 

Watch more in iWant or TFC.tv

Kani-kaniyang paglalarawan ang celebrities sa kanilang pagbibigay pugay kay “Manoy.” 
 
"He is a good actor, he's very versatile, he is very serious about his craft," ani Tirso Cruz III. 

"Naiinggit ako sa kanya. He died with his boots on, in action. Bibilib ka sa kanya. Sa edad na 'yon, nandiyan pa siya. Nasa circulation siya, respetado," anang direktor na si Carlo J. Caparas.

"Noong mawala ang aking asawa, andiyan si Eddie... Nakita ko si Eddie Garcia, nagtatrabaho pa siya... Sila ang naging inspirasyon ko para magpatuloy. Sila ang dapat kong tularan," ani Susan Roces, biyuda ni Fernando Poe. 

Bumisita rin sa lamay si dating senador Jinggoy Estrada at Sen. Richard Gordon.

Suportado naman ng ilan ang hakbang na gawing National Artist si Garcia.

"Of course, he is a legend in our business, at dapat lang siguro. It's too late, talagang dapat mas maaga-aga pa, pero huli man at magaling, okay pa rin," ani Richard Gomez. 

Magtatagal hanggang Linggo, Hunyo 23, ang lamay ni Garcia. 

Bisitahin ang Patrol.PH para sa iba pang mga balita.