Tuluyan nang nagtapos ang kampanya nina Thamara Alexandria at Andrei King sa “Pinoy Big Brother” adult edition.

Nitong Sabado, namaalam ang dalawa matapos makakuha ng pinakamababang combined vote to save and evict scores. Sila ang unang evictees sa “PBB” sa kanilang edisyon.

Nakakuha lamang ng 9.36% na boto si Alexandria habang 18.69% naman ang naitala ni King, dahilan upang maalis sa Bahay ni Kuya.

Mananatili naman si Roque Coting matapos manguna sa botohan sa kaniyang 20.88% na boto.

Bago lumabas ng “PBB” house, ipinaalala ni Big Brother kay Alexandria na naging isang kapatid at kaibigan ito sa kaniyang mga kasamahan.

“Naniniwala akong marami kang natutunan na bubuo sa 'yong pagkatao. Ipinakita mo na ikaw ay tumayo bilang isang kapatid, kaibigan, at ikaw ay naging sandalan ng iyong mga kasama,” ani Kuya.

• PBB housemates sumabak sa live selling fundraiser para sa Odette victims

Umaasa naman si Big Brother na ipagpapatuloy ni King ang kaniyang pagsusumikap kahit nakalabas na ito sa kompetisyon.

“Bilang isang dreamer, hindi maikakaila na ipinakita mo ang iyong determinasyon sa paghahabol ng iyong pangarap. Sa paglabas mo ng aking bahay, nawa'y dalhin at panatilihin mo ang iyong ipinakitang pagsisikap,” saad ni Kuya sa kilalang streamer.

• PBB: Nominadong housemates, naglabas ng saloobin

Mapapanood ang “PBB” araw-araw sa Kapamilya Channel, Kapamilya Online Live, A2Z Channel 11, iWantTFC, at TFC. Mayroon din itong 24/7 livestreaming sa Kumu.