Ika nga nila, "laban lang."

Muling naghain ng kandidatura nitong Huwebes ang dalawang dati nang kinilala ng Commission on Elections (Comelec) na nuisance candidate — isang noon pang 1998 na halalan sinusubok na makatakbo at isang dating nagpakilalang "mister" ni Kris Aquino.

Kahit paulit-ulit nang tinanggihan ng Comelec at tinawag na nuisance candidate, nagtungo pa rin ang refrigerator technician na si Benjamin Rivera sa tanggapan ng Comelec sa Intramuros para ihain ang kaniyang certificate of candidacy (COC) sa pagkaalkalde ng Maynila.

Rivera, 76, a refrigerator technician, believes he can campaign with a 50k budget. He explains why he still wants to run... pic.twitter.com/ZG61tRIcDa

— Nikolo Baua (@Nikobaua) October 11, 2018

Sa panayam ng ABS-CBN News, sinabi ng 76 anyos na si Rivera na ipinagkikibit-balikat lamang niya ang pagbansag sa kaniyang nuisance candidate.

"Hindi ako nawawalan ng gana," sabi ni Rivera, na nagsimulang sumubok sa pagtakbo sa politika mula pa noong 1998.

Dagdag ni Rivera, sakaling siya ay mahalal ay uutusan niya ang mga opisyal ng gobyernong dawit sa katiwalian na tumungo sa kaniyang opisina at magsagot ng "preliminary questions."

Hinirang ding nuisance candidate noong halalan noong 2013 at 2016 si Daniel Magtira, na dating nagpakilalang asawa ni Kris Aquino.

Dating nagpakilalang asawa ni Kris Aquino na si Daniel Magtira, naghain ulit ng COC. Pagsusulong ng Pinoy rock band, tututukan kapag naupo sa Senado. | via @JohnsonManabat #Halalan2019 pic.twitter.com/gh78NDeTxi

— DZMM TeleRadyo (@DZMMTeleRadyo) October 11, 2018

Naghain ulit si Magtira nitong Huwebes ng COC sa pagkasenador. Sinabi niyang tututukan niya raw ang muling pagpapasigla ng Pinoy rock sakaling mahalal.

Nagpahabol din ng mensahe si Magtira kay Aquino: "Kris Aquino, kung nanonood ka ngayon, umiibig pa rin ako sa 'yo."

Naghain din ng kandidatura sa pagkasenador si Agi Tuana, na nagpakilalang "ex" ng dating Presidential Communications official at blogger na si Mocha Uson.

A man identifying himself as Agi Tuana is now in COMELEC, saying he will be running for senator for next year's midterm election | via @JervisManahan #Halalan2019 pic.twitter.com/kA8M4ezaqH

— ABS-CBN News (@ABSCBNNews) October 10, 2018

Ayon kay Tuana, na nangangasiwa umano ng isang junk shop sa Maynila, nais niyang mahalal sa Senado upang mapababa ang presyo ng petrolyo at makatulong sa pagsugpo sa krimen.

"Kailangan babaan natin ang langis, labanan 'yung crime, pati trapik," sabi ni Tuana.

Ukol naman sa dati niya raw kaugnayan kay Uson: "Matagal na 'yun, college pa ko. Parang ano lang, one-night stand lang."

Emilio Delfin Tagean filed his COC for senator, identifies self as 'King Salam of Maharlika Kingdom', vows to fight for the disputed territories in West Philippine Sea. | via @rongagalac #Halalan2019 pic.twitter.com/GYzsP7VRJj

— ABS-CBN News (@ABSCBNNews) October 11, 2018

Nais ding tumakbo sa pagkasenador ni Emilio Delfin Tagean, na nagpakilalang "Haring Salam ng Maharlika Kingdom."

Nangako si Tagean na ipaglalaban ang mga pinag-aagawang teritoryo sa West Philippine Sea.

Ayon sa Comelec, pag-aaralan pa naman nila ang lahat ng mga nais kumandidato kung may kakayahang magsagawa ng isang nationwide campaign.

Noong halalan noong 2016, sa 140 nagsumite ng COC sa pagkasenador ay 90 ang idineklarang nuisance candidate habang 50 ang pinayagang tumakbo.

-- May ulat nina Niko Baua, Ron Gagalac, at Patrick Quintos, ABS-CBN News