Isang pares ng mamahaling melon ang naibenta nitong Sabado sa halagang 3.2 milyong yen (P1.5 milyon) sa Japan.

Nangyari ang subastahan ng mga Yubari melon sa Sapporo Central Wholesale Market sa Hokkaido, Japan, ayon sa ilang opisyal.

"Yubari melons are growing well this year as sunshine hours have been long since early May," ani Tatsuro Shibuta, tauhan sa nasabing pamilihan.

(Patuloy na gumaganda ang paglaki ng Yubari melon ngayong taon dahil sa tumatagal na pagsikat ng araw.)

Nalagpasan nito ang dating rekord na 3 milyong yen (P1.4 milyon) sa subastahan na nangyari 2 taon na ang nakalilipas.

Itinuturing na karangyahan ang pagkakaroon ng nasabing prutas kaya't binibili ito ng mga tao bilang regalo sa kanilang kaibigan.

Malalaman na maganda umano ang kalidad ng Yubari melon kung makinis ang balat at bilog na bilog ito. Mayroon din dapat hugis letrang 'T' na tangkay sa kaliwa ng prutas.

Ibinibenta ang Yubari melon sa loob ng pinalamutian na kahon.

-- Isinalin mula sa ulat ng Agence France-Presse