Watch more in iWantv or TFC.tv

MAYNILA (UPDATE) — Sinimulang ipamahagi ngayong Miyerkoles ang fuel subsidy para sa mga jeepney driver na dumadaing dahil sa sunod-sunod na pagtaas ng presyo ng produktong petrolyo kamakailan.

Sa ilalim ng panibagong fuel subsidy program ng pamahalaan, 136,000 unit ng public utility jeepney ang makakatanggap ng tig-P7,200.

Ayon sa Land Transportation Franchising and Regulatory Board (LTFRB), 73,000 sa mga benepisyaryo ang nakatanggap na ng halaga sa pamamagitan ng kanilang Pantawid Pasada Program card.

Happening now: 136,000 PUJ units will receive a fuel subsidy of P7,200. LTFRB reported that 73,000 have already received the amount in their Pantawid Pasada Program (PPP) cards, while Landbank has already credited a total of Php562M out of the P1B total budget for the program. pic.twitter.com/37FHplYosA

— Zen Hernandez (@zenhernandez) November 24, 2021

Binigyang diin din ng LTFRB na maaari lang magamit ang subsidiya sa mga sumusunod na gasolinahan: Petron, Shell, Seaoil, Total, Ketti Petroleum, Rephil, Caltex, Petro Gazz at Unioil.

Hindi umano maaaring i-withdraw ang halaga para sa ibang bagay bukod sa pagpapagasolina.

Samantala, nagpahayag naman ng suporta ang LTFRB sa ideyang magkaroon din ng mga assistance program para sa mga tsuper ng ibang pampublikong sasakyan.

Pero sa pag-iikot ng ABS-CBN News, wala pang abisong natatanggap ang mga gasolinahan ukol sa fuel subsidy.

Wala pa ring namo-monitor ang transport group na Piston na miyembro nilang nakatanggap ng ayuda.

Para kay Piston National President Mody Floranda, masyadong maliit ang bilang ng mga benepisyaryo.

Para kay Floranda, dapat ibaba ang presyo ng produktong petrolyo sa pamamagitan ng pag-alis sa value-added tax at excise tax na ipinataw dahil sa Tax Reform for Acceleration and Inclusion Law.

Muling namahagi ang pamahalaan ang fuel subsidy matapos magkaroon ng 10 sunod-sunod na linggong oil price hike.

Dahil sa serye ng oil price hike, naghain din ng petisyon ang mga transport group na itaas sa P12 ang kasalukuyang P9 minimum na pasahe sa mga jeep.

• Petisyon para sa taas-pasahe di pa rin babawiin: transport groups

— Ulat ni Zen Hernandez, ABS-CBN News