MAYNILA— Umaaray ang ilang may-ari ng mga karinderya dahil sa pagtaas kamakailan ng presyo ng siling labuyo.

Kung noon, puno ng siling labuyo ang basket sa karinderya ni Jayson sa Sta. Mesa, Manila, ngayon, ilang piraso na lang ang laman nito.
Imbes na kada kilo, tingi-tingi na lang ang sili na kaniyang binibili.

Nitong mga nakaraang araw, pumalo na sa P400 hanggang P600 ang presyo ng kada kilo ng siling labuyo.

Kwento ni Jayson, sa P20 niya, 4 na piraso ng siling labuyo lang ang kaniyang nabilbili kaya kapag may mga customer na humihirit ng ekstrang sili, pinagbabayad na nila ang mga ito ng P5 kada piraso.

• DTI tatawad sa hirit na P4 taas-presyo ng tinapay

Sa isang paresan naman sa Malate, tumigil na muna sa pagbili ng sili kahit na ito pa rin ang paboritong hanapin sa kanila ng mga customer. Saka na lang sila bibili, kapag bumaba na muli ang presyo nito.

"Noong bumili po kami ng sili around P20 pesos lang siya kada kilo. Nakapag-stock na po kami ng 10 sacks bago siya nagmahal... Ngayon 'di na muna kami bibili. Bakit? Bale may alternative na po kaming ginagamit. Gumagamit na muna kami ng hot sauce para sa pangangailangan ng customer," ani Russell Reyes, may-ari ng paresan.

Bagamat ang ilang customer, mahilig maglagay ng sili sa kanilang mga putaheng kinakain, nauunawaan naman nila ito.

Sa ilang palengke nitong linggo, nagkaroon ng kakulangan sa supply ng siling labuyo dahil tag-ulan. Mas mahirap umano magpabunga ng sili tuwing tag-ulan kaya kaunti lang ang mga siling naipadadala sa mga pamilihan.

• Siling labuyo burns wallets as monsoon stokes inflation
• Plant your own 'sili,' says agri chief amid soaring prices

—Ulat ni Larize Lee, ABS-CBN News