MAYNILA—Hindi pa posible na maipababa ang presyo ng bigas sa P20 kada kilo sa 2023, ayon sa isang grupo.

"Malabo po siguro 'yang 2023 na 'yan kasi kung titingnan niyo po buong mundo po ngayon nagkakaproblema tayo sa mga pataba o mga fertilizer. Nagiging doble o triple na po presyo," ani Philippine Confederation of Grains Association president Joji Co sa panayam sa TeleRadyo.

Nagkakaroon din umano ng kakulangan ng supply sa pataba dahil sa giyera sa pagitan ng Ukraine at Russia.

Sinabi ni dating Agrarian Reform Secretary Bernie Cruz na puwedeng ibaba sa P20 kada kilo ang presyo ng bigas sa 2023 sa pamamagitan ng "mega farm".

• Presyong P20/kilo para sa bigas, hindi pa posible —papasok na DAR Secretary

Dagdag ni Co, maraming magsasaka ang wala nang ganang magtanim dahil lugi at dahil na rin sa patuloy na importasyon.

Matagal na rin umanong napabayaan at napag-iwanan ang grains industry sa bansa sa kabila ng pagpapalit-palit ng administrasyon.

"Natatakot ang mga rice mills na mag-invest ng malaking pera sa kalagitnaan ng administrasyon kung babaguhin ang polisiya," ani Co.

Nitong Huwebes, tumaas nang P3 ang presyo ng bigas sa ilang pamilihan sa Metro Manila.

Ayon sa mga nagtitinda, may patong na P10 hanggang P30 ang bawat kaban ng mga biyahero dahil nagtaas umano ang farm gate price ng mga magsasaka.

Ramdam na rin ang epekto ng sunod-sunod na oil price hike noong mga nakaraang linggo.

• Presyo ng bigas tumaas nang P3 sa ilang palengke sa Metro Manila

Watch more News on iWantTFC