Ipinatitigil na ang operasyon ng mining site na kumalbo sa kabundukan ng Brooke's Point, Palawan nitong Biyernes.

Inihain ang suspension order ng tree-cutting permit at earth-balling permit ng Ipilan Nickel Mining Corporation upang huminto na sila sa operasyon.

Inihain din dito ang show-cause order at inutusan silang magpaliwanag sa loob ng tatlong araw kung bakit hindi sila dapat kasuhan sa kanilang pag-operate sa kabila ng kanselasyon ng kanilang Environmental Compliance Certificate (ECC) permit.

Si Environment Secretary Roy Cimatu na mismo ang pumunta sa kabundukan na kinalbo ng minahan matapos na ilang beses tumanggi itong papasukin ang mga awtoridad ng lokal na gobyerno at DENR para mag-inspeksyon.

"Hindi ko rin nagustuhan na hindi kayo pinapapasok. Iba-back up ko kayo. Be man enough to face it," ani Cimatu.

Abril 2 nang unang mag-rally ang mga residente dahil sa kabila ng kanselasyon ng ECC permit ay patuloy umano ito sa pag-operate.

Mayo 13 nang muli itong sinugod ng mga awtoridad dahil sa pagpuputol ng libo-libong mga puno. Ayon sa minahan, titigil lang sila kung magbababa ng papel ang DENR central office.

"Pagpapasok daw kami babarilin daw kami. Wala silang mayor's permit, fencing permit, tuloy-tuloy trabaho nila,” ani Mayor Jean Feliciano ng Brooke’s Point.

"We told them na tigil muna but they wrote me na abuse of authority daw ako. Nag-cut sila without the presence of DENR,” ani Felizardo Cayatoc ng Provincial Environment and Natural Resources Officer.

Ang pinanghahawakan ng minahan ay naghain sila ng motion for consideration sa kanseladong ECC at dahil walang sagot ang central office, ang pagkakaintindi nila patuloy pa rin ang bisa ng kanilang tree cutting permit na sa may 26, 2017 pa ang expiration.

“No answer si DENR so we expect na we can still operate,” ani Engr. Ferdinand Libatique, resident mine manager ng Ipilan Nickel Mining Corp.

Pero nilinaw ng Mines And Geosciences Bureau Mimaropa at DENR Mimaropa na hindi dapat sila mag-operate dahil kanselado na nga ang ECC permit nila.

"Tree-cutting permit is render[ed] void kasi considered mining iyun. Kinakagalit namin kahit DENR staff natin hindi pinapasok dito. Despite na sinulatan na itigil di sila nakikinig,” ani Natividad Bernardino, regional director ng DENR Mimaropa.