Watch more in iWantv or TFC.tv

Pihadong tataas ang bayarin sa kuryente dahil sa pagsipa ng konsumo rito ngayong tag-init, ayon sa Meralco.

Ayon sa power distribution company, kahit di pa tumataas ang electricity rate ng Meralco bill para sa Mayo, asahan na dapat ng mga konsumer ang mas malaking bayarin dahil sagad-sagad din sa paggamit ng appliances para maging maalwan ngayong matindi ang init.

"Napakainit ng panahon, talagang hindi mo matitiis na [hindi] bubuksan ang air-conditioning units, mas iinom ka nang madalas ng tubig [kaya] bubuksan mo ang refrigerator mo," ani Joe Zaldarriaga, tagapagsalita ng Meralco.

Katunayan, nitong Lunes, Abril 23, pumalo sa 10,380 megawatts ang konsumo sa kuryente ng buong Luzon.

Mas mataas na ito sa pinakamatinding konsumo ng kuryente noong tag-init ng nakaraang taon na pumalo sa 10,054 megawatts noong Mayo 2017.

Sa kasagsagan din ng tag-init, karaniwang bumabagsak ang mga planta ng kuryente na nagpapataas ng presyo sa spot market.

Tingin ng grupong Laban Konsyumer, dapat ilabas ang listahan ng mga plantang may scheduled maintenance at biglaang bumagsak dahil lubhang apektado nito ang mga konsumer,

"At the end of the day, consumer po ang talo. Hindi po dapat lahat, pasa todo sa 'tin ang epekto ng pagtaas ng presyo sa spot market," ani Atty. Vic Dimagiba, presidente ng Laban Konsyumer.

Pinag-aaralan na ng Energy Regulatory Commission (ERC) kung paano ang sistema ng pagdisiplina sa mga "siraing" planta.

"Mayroong mga mechanism naman para ma-verify 'yon bang cause ng shutdown na 'yan [ay] justifiable," ani Atty. Rexie Baldo-Digal, tagapagsalita ng ERC.

Dalawang magkasunod na buwan nang tumaas ang singil ng Meralco dahil sa pagmahal ng presyo ng kuryente sa spot market.

• Meralco, may P0.225/kWh dagdag-singil ngayong Abril
• Singil ng Meralco sa Marso, tataas ng P0.85/kWh

-- Ulat ni Alvin Elchico, ABS-CBN News