Presyo ng ilang gulay, isda nagmahal sa pag-arangkada ng ECQ sa NCR Plus

ABS-CBN News

Posted at Mar 29 2021 08:07 PM

MAYNILA — Nagmahal ang presyo ng ilang klase ng gulay at isda sa ilang pamilihan kasabay ng pagpapatupad ng enhanced community quarantine (ECQ) sa Metro Manila at mga karatig-probinsya nito.

Sa Pasig City Public Market, may mangilan-ngilang klase ng gulay gaya ng carrots, Baguio beans, amargoso, pechay at patatas na nagmahal kung ikukumpara ang presyo ng mga ito noong Marso 25.

• Carrots → P60-P80/kg
• Baguio beans → P60-P80/kg
• Amargoso → P50-P80/kg    
• Pechay → P40-P50/kg
• Patatas → P40-P60/kg

Nagkaroon din ng parehong mga pagtaas sa Muñoz Market at iba pang palengke sa QC.

Samantala nagmahal rin ang ilang isda gaya ng galunggong at tulingan sa ilang pamilihan sa Tandang Sora market.

• Galunggong
→ Dati: P150-P180/kg
→ Ngayon: P200-P250/kg

• Tulingan
→ Dati: P150-P160/kg
→ Ngayon: P200-P220/kg

Nagmahal din ng P40 kada kilo ang galunggong na lokal sa Guadalupe market sa Makati, at P5 hanggang P10 naman ang itinaas ng presyo ng bangus at tilapia sa Quinta market sa QC.

"Sa ngayon po, nag -ECQ po, medyo mabili po kasi. Nagpa-panic buying po ang mga tao. Sa presyo naman po, dahil walang makuhanan ng supply, medyo nagtataas po ang mga isda ngayon po," anang tindero na si Rio Pili.

Tatagal hanggang Abril 4 ang ECQ sa NCR Plus, pero maaari pang palawigin dahil sa muling pagsirit ng COVID-19 cases.

—Ulat ni April Rafales, ABS-CBN News

Bisitahin ang Patrol.PH para sa iba pang mga balita.