SUGGESTED RETAIL PRICE ng surgical face mask, itinaas na sa P28/piraso mula sa P12 dahil sa pagmahal ng raw materials. DTI, nangakong paparating na ang supply para sa Mercury, South Star at TGP sa weekend or next week. pic.twitter.com/WqvldMBiMI

— alvin elchico (@alvinelchico) March 19, 2020

Mula P12, tumaas sa P28 ang suggested retail price ng kada piraso ng surgical face masks, ayon sa opisyal ng Department of Trade and Industry.

Tumaas kasi ang presyo ng raw materials na ginagamit sa paggawa ng face masks, ayon kay Ruth Castelo, Trade undersecretary for consumer protection.

Inuna lang din daw ang pamamahagi ng face mask sa frontliners, gaya ng health workers at mga pulis, kaya nahuli ang pagsu-supply sa mga pribadong botika.

Watch more in iWantv or TFC.tv

Posibleng sa weekend ay magkaroon na ng supply ng face masks ang mga botika, ayon kay Castelo.

Hindi na rin umano natuloy ang pag-angkat ng Pilipinas ng face masks sa India dahil sa pabago-bagong presyo, na nangangahulugang manggagaling ang lahat ng supply muna sa lokal na manufacturer na Medtecs.

• BALIKAN: Gobyerno mag-aangkat ng surgical masks sa India

Ayon sa DTI, nangako ang Medtecs na magsu-supply ng 5 milyong face masks kada buwan para sa health workers, pulis, mga kawani ng gobyerno, at pribadong botika.

Nagkaroon ng kakulangan sa supply ng face masks nitong mga nagdaang buwan bunsod ng magkasunod na pagputok ng Bulkang Taal at pagkalat ng 2019 coronavirus disease.

-- Ulat ni Alvin Elchico, ABS-CBN News