MANILA - Isinara sa mga motorista Martes ang Manila-Cavite Road dahil sa baha na nagpalubog sa ilang bahagi nito.

Binaha ang naturang lansangan at malaking bahagi ng Noveleta, Cavite nang umapaw ang Ilang-Ilang River sa kasagsagan ng malakas ng ulan na dala ng Bagyong "Maring," ayon kay Noveleta Mayor Dino Reyes Chua.

"Kanina pong bandang alas-3 ng madaling-araw, umapaw po ang ilog, iyung ating Ilang-Ilang River. D'yan po nanggaling ang malakas na agos ng tubig-baha," ani Chua sa panayam ng DZMM.

Dahil sa walang tigil na pag-ulan, umapaw ang Ilang Ilang River sa Noveleta, Cavite at nagdulot ng pagbaha | via @biancadava #FloodPatrol pic.twitter.com/QHTSGH6IDH

— ABS-CBN News (@ABSCBNNews) September 11, 2017

Dagdag ng alkalde, nasira ang breakwater ng ilog kaya umapaw ito.

Dahil dito, umabot hanggang dibdib ang baha sa ilang bahagi ng Manila-Cavite Road at Noveleta, kuwento ng ilang residente sa DZMM Radyo Patrol.

Nahuli naman sa baha ang isang sawa na nasa 7 hanggang 8 talampakan.

Una nang nagbabala ang PAGASA na magdadala si Maring ng katamtaman hanggang malakas na ulan sa Bicol, Calabarzon, Mimaropa, Metro Manila, Central Luzon, at Pangasinan.

Inaasahang magla-landfall ang bagyo sa Quezon- Aurora area martes ng hapon.

Para sa iba pang ulat-panahon, bisitahin ang ABS-CBN Weather Center.

DZMM, 12 Setyembre 2017