Nagpasalamat si John Lloyd Cruz sa fans na tumangkilik sa blockbuster hit nila ni Sarah Geronimo na "Finally Found Someone."

Mula Portugal, nagpaabot ng mensahe ang aktor na kasalukuyang naroon para sa isang shoot.

"Nagpapasalamat po kami dahil pinaabot niyo po sa 200 million [pesos] ang kinita na so far ng aming maliit na pelikula."

Hinikayat niya rin ang mga di pa nanonood ng pelikula na huwag magpahuli sa kilig at panoorin na ang "Finally Found Someone".

Tiniyak din ni John Lloyd na mapapanood maging ng fans abroad ang pelikula, partikular na sa mga lugar na may The Filipino Channel.

Sa unang apat na araw pa lang ng pelikula, mula nang ipalabas ito noong Hulyo 26, kumita na agad ng P100 milyon ang "Finally Found Someone."

Ikaapat na pelikulang pinagtambalan nina Sarah at John Lloyd ang "Finally Found Someone". Bago nito, tumabo na sa takilya ang iba nilang pinagsamahang pelikula na “It Takes a Man and a Woman” (2013); “You Changed My Life” (2009); at “A Very Special Love” (2008).