Nag-abiso ang Department of Energy (DOE) sa mga kumpanya ng langis na huwag munang patawan ng excise tax ang presyo ng petrolyo sa darating na Enero 1.

Ayon kay DOE undersecretary Wimpy Fuentebella, lumang stock pa naman ang ibebenta kahit pa sumapit na ang bagong taon.

Paalala niya, ipapataw ang excise tax sa mga aangkatin pa lang na langis. "Ang excise tax ay ipinapataw sa importation at hindi sa point of sales," ani Fuentebella.

• Oil price hike looms amid new tax law

Sinuportahan naman ng Tax Management Association of the Philippines ang posisyon ng DOE.

"New excise tax rates will apply for articles removed/imported by January 1, 2018. If what is sold at the gas station is from inventory where excise tax has already been paid, pump price shouldn't increase yet," ayon sa grupo.

Maglalabas umano ang DOE ng klaripikasyon kung iiral na ba ang dagdag sa presyo ng petrolyo.

Kinumpirma rin ng ahensiya na may old stock o inventory pa ang mga oil companies na napatawan ng current o mas mababang excise tax.

Hinikayat naman ng grupong Laban Konsyumer ang Department of Finance na maglabas din ng kaukulang regulations.

--Ulat ni Alvin Elchico, ABS-CBN News