MANILA – Maaari nang magsumbong sa inter-agency council on traffic (i-ACT) ang mga mahihingian ng lagay o "kotong" ng mga traffic enforcers, gamit ang isang online portal.

3 barangay captains, pinagpapaliwanag ng I-ACTsa maruming estero. pic.twitter.com/6bAQU6RCqH

— AlexiusCalda (@alexiuscalda) December 2, 2016

Inilunsad ng i-ACT Biyernes ng umaga ang “I Will Act” portal, isang online platform para sa mga nais magparating ng kanilang mga sumbong, ani Metro Manila Development Authority (MMDA) Acting Chairman Thomas Orbos.

Ayon sa i-ACT, maliban sa mga enforcer na nanghihingi ng lagay, maaari rin umanong magsumbong dito ng iba’t ibang isyu tulad ng iligal na pagparada ng sasakyan, iligal na pagsakay at pagbaba ng pasahero ng mga pampasaherong sasakyan, maruming estero, bus na bukas ang pintuan habang tumatakbo, mga nakaharang sa bangketa, iligal na terminal ng pampasaherong sasakyan, overloaded na public utility vehicles, pinabayaang hukay sa kalsada, at iba pa.

May kampanya rin ang i-ACT laban sa mga pasaway na taxi driver, kaya’t maaari rin itong isumbong sa I Will Act portal.

Ang mga magsusumbong ay kailangang magbigay ng kumpletong detalye ukol sa problema sa trapiko at iba pa, at siya rin ay obligadong humarap sa hearing, ayon sa i-ACT, bilang bahagi ng kaso na ihahain laban sa mga lumabag ng patakarang pantrapiko.

Para umano sa mga sumbong na hindi matutugunan ng i-ACT tulad ng mga barado at maruming estero, ipaparating anila ito sa Department of Interior and Local Government o sa Office of the Ombudsman.

Matatagpuan ang portal sa http://www.mmda.gov.ph/i-will-act.