Inaresto ng National Bureau of Investigation (NBI) ang isang babae dahil sa panghikayat umano nito sa mga banyagang terorista na umanib sa Maute sa pakikipagbakbakan sa Marawi.

Iniharap ng NBI nitong Miyerkoles ng umaga sa publiko si Karen Aizah Hamidon, 36 anyos, na nahuli noong nakaraang linggo sa Taguig.

• BASAHIN: 'ISIS recruiter' timbog sa Taguig

Binantayan kasi ng ahensiya ang kaniyang mga mensahe noong Setyembre na pinadala sa online messaging app na WhatsApp at Telegram.

Pinadala ang mga mensahe sa mga bansang India, Australia, Indonesia at Amerika.

Nanghikayat umano siya ng mga banyagang terorista na makiisa sa grupong Maute sa Marawi.

Hindi pa masabi kung miyembro ng Maute Group si Hamidon, na taga-Zamboanga.

Pero ang babae, dati raw asawa ni Muhammad Shamin Mohammed Sidek, isang Singaporean na nakulong dahil sa pakikipag-ugnayan sa international terror group na Islamic State.

Asawa rin umano siya ni Mohammad Jaafar Maguid na salarin umano ng Davao blast noong isang taon.

Sasailalim sa forensic examination ang cellphone at laptop ni Hamidon.

Iniimbestigahan pa kung recruit ni Hamidon ang mga banyagang lumaban sa Marawi.

Noong Abril, nahuli ang mag-asawang Syrian at Kuwaiti na miyembro umano ng Islamic State na sina Rahaf Zina at Husayn Al Dhafiri.

Mayo naman nang mahuli si Russel Salic na itinuturong financier o tagapondo ng ilang terorista.

Hindi pa matukoy kung konektado si Hamidon sa kanila.

-- Ulat ni Niko Baua, ABS-CBN News