Aabot sa P11 milyon na halaga ng troso galing San Jose Mondragon, Northern Samar ang nakumpiska ng mga otoridad sa Liloan Port sa Southern Leyte.

Ayon sa impormasyon, sakay sa apat na wheeler truck ang mga kahoy na ibibiyahe na sana patungong Butuan City nang masita ito ng Enforcement Division ng Department of Environment and Natural Resources (DENR) Regional Office 8, kasama ang mga kinatawan ng Philippine Navy at Philippine Coast Guard.

Isinagawa ang operasyon noong September 12, 2016.

Ayon Kay Carlito Tuballa, Assistant Regional Director for Technical Service ng DENR Regional Office, kulang sa mga kaukulang dokumento ang mga ibibiyahe sanang mga kahoy kaya hinuli ito.

Dahil puno ang opisina ng DENR Regional Office ng mga nakumpiskang mga kahoy, inilagay sa Philippine Navy Compound sa Tacloban ang mga nakumpiskang troso habang nakatakdang magsagawa ng administrative proceedings ang DENR kung saan ipapatawag ang may-ari ng mga kahoy kasama na ang CENRO officer ng Catarman.