MANILA - Masama ang loob ni Bauang, La Union Mayor Martin de Guzman sa pagkakadawit ng kanyang pangalan sa listahan ni Pangulong Rodrigo Duterte ng mga umano'y protektor ng iligal na droga.

Sa panayam ng DZMM, sinabi ni De Guzman na nagtataka siya kung paano nadawit ang kanyang pangalan sa listahan.

"Nakakasama po ng loob kasi iyung mga anak ko, pamilya ko, parang naglaho po iyung kinabukasan ng aming pangalan dahil lamang po dito sa aming pagkakadawit.

"Hindi ko naman po alam kung paano ako napabilang sa sinabi ng Presidente," hinaing niya.

Matagal na anya siyang alkalde ng Bauang at kilala umano ng kanyang mga kababayan ang kanyang kampanya laban sa bawal na gamot.

Nilinaw ni De Guzman na handa siyang magtungo sa Camp Crame, pero hindi para sumuko at kundi ay para linisin ang kanyang pangalan.

DZMM TeleRadyo, 7 Agosto 2016