Viral sa social media ang kuha ng isang netizen sa isang Philippine National Police (PNP) drop box sa isang barangay sa Quezon City.

Maaaring maghulog ang mga residente sa naturang drop box ng mga pangalan ng mga pinaghihinalaang lulong o tulak ng droga.

Ayon kay Brgy. Captain Anna Millonado, epektibo ito para sa paglutas ng problema sa droga ng kaniyang barangay.

"Nakipag-coordinate kami sa PNP to have it in our barangay at masaya kaming ibalita na kami ay isa sa mga drug-free barangay ng Quezon City," ani Millonado.

Suportado naman ng mga residente ng barangay ang programa laban sa droga. Pero may ilang residente ang nangangamba na baka magamit ng mga pasaway ang PNP drop box.

Pahayag ni Chief Supt. Guillermo Lorenzo Eleazar, noong isang taon pa niya iniutos sa lahat ng barangay sa Quezon City na maglagay ng PNP suggestion drop box na hindi lamang humihikayat na mag-ulat tungkol sa droga kundi pati ibang krimen.

Siniguro rin ni Eleazar na dumaan sa beripikasyon ang mga impormasyong ibinibigay ng mga mamamayan.

Dagdag pa ni Eleazar, bahagi rin ng kampanya ng Quezon City Anti-drug Abuse Council ang paglalagay ng mga PNP drop box.

Bukod sa drop box, maaari ring mag-text sa PNP Txt 09178475757 para sa anumang impormasyon tungkol sa anumang krimen.

--Ulat ni Abner Mercado, ABS-CBN News.