MANILA - Pinangalanan ng Manila Police District (MPD) Miyerkules ang isang Army reservist bilang suspek sa pamamaril sa isang lalaking nagbibisikleta sa Quiapo, Manila nitong Lunes.

Kinumpirma ni Sr Insp. Rommel Anicete, hepe ng MPD Homicide Division, na si Vhon Tanto ang pangunahing suspek sa pagpatay sa siklistang si Mark Vincent Geralde.

Opisyal na ring isinapubliko ng MPD ang mga larawan ng suspek.

JUST IN: MPD Homicide, kinumpirma na ang Army reservist na si Vhon Tanto ang suspek sa road rage | via @Dennis_Datu pic.twitter.com/LuHYdSOvB3

— DZMM TeleRadyo (@DZMMTeleRadyo) July 27, 2016

Una nang kumalat sa social media ang mga larawan ng 39-anyos na si Tanto.

Bukod sa pagiging reservist ng Philippine Army, nagtatrabaho si Tanto bilang repairman ng motorsiklo.

Natunton ang suspek base sa kuha ng CCTV camera ng barangay.

Positibo rin siyang kinilala ng isang testigo.

Pahayag ni MPD Homicide Chief Sr.Insp. Rommel Anicete matapos matukoy ang suspek na si Vhon Tanto sa road rage pic.twitter.com/4Qn07Ni7nt

— DZMM TeleRadyo (@DZMMTeleRadyo) July 27, 2016

Binalikan ng MPD Homicide Division ang bahay ng suspek sa Praternal Street, Barangay 385, Zone 39 sa Quiapo.

Pero mula nang mangyari ang insidente ay hindi na umano ito nakita sa lugar, maging ang kanyang Hyundai Eon.

Naka flash alarm na ang naturang sasakyan.

Nanawagan ang MPD kay Tanto na sumuko na.