ISABELA - Ilang mga mag-aaral sa pampublikong paaralan sa Isabela ang wala pa ring mga libro, ilang linggo matapos magsimula ang klase.

Ilang mga guro ang nahihirapan sa pagtuturo ng Araling Panlipunan sa isang paaralan sa Santiago City sa Isabela. Ito ay dahil hanggang ngayon ay hindi pa dumarating ang mga libro para sa mga mag-aaral sa Grade 3.

Nagkaproblema sa mga libro sa Araling Panlipunan dahil mali ang naipadala ng Department of Education (DepEd). Sa halip na pang-Rehiyon II ang libro, mga libro para sa Rehiyon IV-B ang naipadala sa kanila.

Ayon kay Dante Domingo, property custodian ng South Cluster, hanggang ngayon, hindi pa rin tumutugon ang courier o pinagpadalhan ng libro. Hindi rin umano nila alam kung saang panig ng bansa napunta ang librong Araling Panlipunan na para sa mga taga-Isabela.

Kinumpirma rin ni Domingo na hanggang ngayon, wala pa ni isang libro na dumating para sa mga mag-aaral sa Grade 5.

Umaasa ang mga guro at estudyante na matutugunan sa lalong madaling panahon ang kanilang problema.