MAYNILA - Higit P1 milyon halaga ng pera at alahas ng isang pamilya sa Las Piñas City ang tinangay umano mula sa kanilang vault o kaha de yero ng bago nilang tagaluto nitong Martes.

Kuwento ng biktimang si alyas "Nanette", isang doktor, nauna nang nagnakaw sa kanilang bahay ang suspek na si Rachelle Cabe kahit dalawang linggo pa lang itong stay-in sa kanila.

Sa may impormasyon tungkol sa suspek na si Rachelle "Tin" Cabe, makipag-ugnayan lang sa Las Piñas Police pic.twitter.com/ek620K3Kv5

— Anjo Bagaoisan (@anjo_bagaoisan) June 6, 2017

Ayon sa biktima, binigyan pa nila ng pangalawang pagkakataon si Cabe, pero tuluyan nang nasira ang kanilang tiwala dahil sa panibagong insidente ng pagnanakaw.

Kuwento pa nito, day off ng kanilang tagaluto nang madiskubre niyang nawawala na ang kaha de yerong nasa tabi lang ng kama nilang mag-asawa.

Nadiskubre na lang ito ng may-ari ng bahay noong gabi. Bukod sa mga relo na nasa dresser, walang ibang kinuhang valuable pic.twitter.com/z4fshq5yRO

— Anjo Bagaoisan (@anjo_bagaoisan) June 6, 2017

Laman aniya ng natangay na kaha de yero ang mga alahas, cash, tseke, passport, at mga mahalagang papales na aabot ang halaga sa P1.5 milyon.

Natangay rin ng suspek ang ilang relo na nakapatong sa dresser sa kuwarto ng mag-asawa na nakatira sa isang exclusive village sa Barangay Pilar.

Nakita pa umano ng caretaker ng katabing bahay ang suspek nang paalis ito sa bahay. Tinulungan pa nitong isakay sa tricycle ang vault dahil sinabihan siya nitong babasaging pinggan lang ang laman nito.

TINGNAN: Nakita sa CCTV ang sinakyang tricycle ng suspect pati ang vault na tinakpan ng damit pic.twitter.com/1hSd4niVJH

— Anjo Bagaoisan (@anjo_bagaoisan) June 6, 2017

Nagsisisi naman sina Nanette dahil masyado umano silang nagtiwala at agad nilang tinanggap ang 25-anyos na babae nang walang ginagawang background check.