MANILA - Higit 130 bahay ang natupok nang sumiklab ang 2 magkasunod na sunog sa Cebu ng madaliang araw ng Linggo.

Nasa 30 bahay ang natupok sa unang sunog na naitala sa Barangay Labangon, Cebu City pasado ala-1 ng madaling-araw.

Sa imbestigasyon ng Cebu City fire station, nagmula ang sunog sa inuupahang kwarto ng isang mag-asawang kapwa bulag.

Kuwento ng boardmates ng mag-asawa, nakarinig sila ng pagbagsak ng isang bagay bago makaamoy ng usok at sumiklab ang malaking sunog.

Hindi pa namamataan ang mag-asawa matapos ang insidente kaya inaalam ng mga awtoridad kung na-trap sila sa nasunog na bahay.

Aabot sa P200,000 ang pinsalang idinulot ng sunog.

Samantala, alas-2:45 naman ng madaling araw kumalat ang ikalawang sunog sa nasa 100 bahay sa Barangay Pusok, Lapu-Lapu City.

Nagsimula ang apoy sa napabayaang kandila sa bahay ng isang Francisca Nacional, ayon kay fire investigator Climaco Salicid.

Nagtamo ng minor injuries si Nacional at 3 pang indibidwal.

Dakong alas-7:30 ng umaga naapula ang sunog na nag-iwan ng P800,000 halaga ng pinsala.

Pansamantalang nanunuluyan sa Pusok National High School ang mga nasunugan.

-- May mga ulat nina Leleth Rumaguera at Romayne Danielle Polavieja, ABS-CBN News