Nasunugan ang 70 pamilya sa Baseco Compound sa Tondo nitong hapon. Mabilis kumalat ang apoy dahil dikit-dikit at yari sa kahoy ang mahigit 30 barong-barong na natupok.

Kuha ni Bayan Patroller Kevin Gierza Torreto

Ayon sa Bureau of Fire Protection sa Maynila, sumiklab ang sunog alas-dos ng hapon at idineklarang under control matapos ang halos isang oras.

Ani Chief Insp. Marvin Carbonel, hepe ng operations ng Manila Fire Department, hinihinalang naiwang nakabukas na electrical appliance o nagliyab na electrical wiring ang sanhi ng apoy.

Wala namang naiulat na nasaktan o namatay sa insidente.

Mananatili muna sa Baseco evacuation center ang mga nasunugan.

Samantala, nagliyab din ang isang pabrika ng gulong sa Clark, Pampanga, Linggo ng hapon.

Ongoing fire at Angeles/Clark area along SCTEX near Clark Exit pic.twitter.com/3MP34xGXjd

— Jacque Manabat (@jacquemanabat) May 14, 2017

Ayon kay FO1 Adrian Aguilar ng Angeles City Fire Station, unang itinimbre sa kanila ang sunog sa Yokohama Tire Philippines, Inc. pasado alas-tres y medya ng hapon.

Ayon sa ilang trabahador ng pagawaan, nag-umpisa ang sunog sa warehouse ng pabrika na mabilis kumalat.

Wala pang pahayag ang pamunuan ng pabrika kaugnay nitong sunog.

-- Ulat nina Zhander Cayabyab at Kate Cunanan, ABS-CBN News