(2nd UPDATE) Sugatan ang 6 na pulis ng Special Action Force (SAF) matapos silang tambangan ng mga hinihinalang miyembro ng New People's Army (NPA) sa Antipolo, Rizal Linggo ng umaga.

Lulan ng police mobile ang SAF commandos at pabalik na sana sa headquarters nang pagbabarilin ng hindi pa batid na dami ng mga rebelde sa Barangay San Jose, ayon sa pulisya.

Kinalala ang mga nasugatan na sina PO2s Brendo Cariño, Reymar Guevarra, Mark Andrew, Gran Omines, Joseph Alberca at Ryan Gonzales.

Pawang mga miyembro ng 33rd Special Action Company, 3rd Batallion ang mga pulis.

Nilinaw ng Rizal PNP na walang nawawalang miyembro ng Special Action Force na tinambangan ng mga hinihinalang NPA sa Antipolo City | ulat ni @RonLopezPH pic.twitter.com/wX9WxNKvp2

— DZMM TeleRadyo (@DZMMTeleRadyo) February 18, 2018

Nilinaw naman ni Senior Supt. Albert Ocon, director ng Rizal Provincial Police Office, na walang nawawalang miyembro ng SAF sa engkwentro, salungat sa naunang lumabas na balita.

Isa lamang sa mga pulis ang tinamaan ng bala na nasa ligtas ng kalagayan, dagdag niya.

Ang 5 iba pang pulis ay nagtamo lang ng sugat matapos tumalon sa kanilang sasakyan.

Pinaghahanap na ngayon ng otoridad ang mga umano'y miyembro ng NPA na agad tumakas matapos ang pananambang. - ulat ni Jeffrey Hernaez at Ron Lopez, ABS-CBN News