(UPDATED) - Binawi ng isang testigo sa illegal drug case laban kay Kerwin Espinosa ang kanyang testimonya at sinabing napilitan lamang siyang idawit si Espinosa sa kaso.

Sa pagharap sa Manila Regional Trial Court Branch 26 ngayong Biyernes, sinabi ng testigong si Jose Antepuesto sa harap ni Presiding Judge Silvino Pampilo Jr. na walang katotohanan ang kanyang mga paratang kay Espinosa.

Aniya, tinakot lamang siya ng mga pulis na idiin si Espinosa sa illegal drug trade sa Eastern Visayas.

Ayon kay Antepuesto na isang welder at unang naaresto dahil sa pagtutulak ng droga, pumayag lamang siyang pirmahan ang affidavit na nagdadawit kay Espinosa kapalit ng pangako ng mga pulis na hindi siya idadamay sa kaso.

Humarap din sa witness stand sa kaso ang testigong si Marcelo Adorco na bodyguard at driver ni Espinosa bagamat hindi ito nagbago ng kanyang pahayag.

PANOORIN: Kerwin Espinosa, ikinagalak ang pagbaligtad ng testigo sa kanyang kaso pic.twitter.com/xYHDobJHhF

— Ron Lopez (@RonLopezPH) January 26, 2018

Sa panayam sa DZMM, sinabi ni Espinosa na hindi niya inaasahan ang pagbaligtad ni Antipuesto kaya't masaya siya sa nangyari at naniniwalang malaki ang maitutulong nito sa kanilang kaso.

Si Espinosa ay nahaharap sa 3 bilang ng paglabag sa Comprehensive Dangerous Drugs Act. Siya ay anak ni dating Albuera Leyte Mayor Rolando Espinosa Sr. na napatay sa loob ng kulungan sa sinasabing kaso ng rubout.