Itataas ng Department of Health (DOH) simula Enero 8 ang code white alert sa lahat ng ospital sa Maynila kasabay ng pagdiriwang ng pista ng Itim na Nazareno sa lungsod.

#OnTheSpot Mga ospital sa Maynila, itataas sa code white alert simula Enero 8; DOH, may paalala sa mga sasama sa Traslacion #Nazareno2018 | ulat ni @RayaCapulong pic.twitter.com/bCESeezlwx

— DZMM TeleRadyo (@DZMMTeleRadyo) January 4, 2018

Ayon kay Patrick Co ng DOH-National Capital Regional, paiigtingin ng ahensiya ang paghahanda ng bawat ospital sa Maynila para sa mga debotong makikiisa sa Traslacion na mangangailangan ng serbisyong medikal.

Sa ilalim ng code white, hindi papayagang lumiban ang lahat ng tauhan ng ospital, lalo na ang mga nakatalaga sa emergency rooms.

Libre naman umano ang pagpapagamot para sa mga taga-Maynila.

Nagpaalala ang DOH sa mga dadalo sa pagdiriwang na huwag nang magsama ng bata.

Hindi na rin pinapayuhan ang mga buntis at may sakit na makisabay sa prusisyon.

#OnTheSpot NDRRMC naka-blue alert sa Traslacion ng Poong Nazareno #Nazareno2018 | ulat ni @dzmmPatrol44 pic.twitter.com/DmsPCEYqjp

— DZMM TeleRadyo (@DZMMTeleRadyo) January 4, 2018

Samantala, ipatutupad ng National Disaster Risk Reduction and Management Council (NDRRMC) ang blue alert sa Enero 9, mismong araw ng Traslacion.

Ayon kay NDRRMC Spokesperson Romina Marasigan, magdamag na babantayan ng mga katuwang na ahensiya ng NDRRMC ang okasyon para sa mabilis na pag-ayuda sa anumang hindi inaasahang kagipitan.

Kabilang dito ang Armed Forces of the Philippines at Department of Public Works and Highways.

Ilalagay naman sa red alert status ang Manila Disaster Risk Reduction Management Office.

-- Ulat nina Raya Capulong at Henry Atuelan, ABS-CBN News