Sa panahon ng tag-ulan, maraming tao ang nagkakasakit. Isa sa mga pamahiin ng matatanda ay dalhin ang may sakit sa manghihilot para ipadurog ang kulani na lumabas sa kanya.

Pero ano ba ang kulani?

Sa programang "Magandang Gabi Dok," ipinaliwanag ni Dr. Edwin Bien, medical director ng LeBien Wellness Specialists, kung ano ang papel ng kulani sa katawan ng tao.

Kulani o lymph nodes ang tawag sa hugis beans na mga glandula na nakakalat sa buong katawan.

"Ang kulani ay masasabi natin na parang barracks, tirahan ng mga panlaban natin sa karamdaman o soldier of the body," ani ng doktor sa DZMM.

"It is a defense whether ito ay para sakupin, patungan, at kainin ang mikrobyo or gumawa ng chemicals which we call antibodies na ang purpose ay to neutralize the chemical, the offending organism na ang tawag ay antigen," paliwanag ni Bien.

Tumutulay sa lymph nodes ang lymphatic fluids na naglalaman ng white blood cells na siyang nagdudulot ng pamamaga nito. Ang tawag sa abnormal na paglaki ng lymph nodes ay lymphadenophy.

"Normally, hindi ito nakakapa. Kapag nakapa na ito, it means something is going on," pahayag ni Bien.

Dagdag ni Bien na minsan, lumalaki ang kulani na halos katulad ng lansones.

Ayon sa doktor, lumalaki lang ang kulani kung may virus na pumasok sa katawan ng tao.

Pahayag ng doktor sa DZMM, mainam na sumangguni sa mga doktor upang malaman kung ano ang sanhi ng kulani.

"It is a sign that there is something going on an underlying illness," ani Bien.