PALAWAN - Kilala ang Palawan bilang isa sa mga pinakamagandang isla sa mundo, at para sa mga miyembro ng Sangguniang Panlalawigan ng Palawan, mainam rin na kilalanin ang lalawigan sa sarili nating bansa.

Dahil dito, plano ng Sangguniang Panlalawigan na hilingin kay Department of Tourism Secretary Wanda Teo na kilalanin ang Palawan bilang "Island Hopping/Diving Destination Capital of the Philippines."

Mayroong iba't ibang isla na maaring bisitahin sa Palawan, katulad ng Honda Bay sa Puerto Princesa, mga isla sa Coron, mga lagoon sa El Nido, ang mga isla sa Dumaran at San Vicente, at ang umuusbong na island-hopping adventure sa bayan ng Magsaysay, Taytay at Balabac.

Hindi rin kaila na tahanan ang Palawan ng mga shipwreck sa Coron at ang mayamang karagatan ng Tubbataha Reefs Natural Park.

Ayon sa mga board member, baka maaaring ideklara ng DOT ang Palawan bilang best island.

Mainam rin umano na magkaroon ng bagong tagline para sa turismo ng Palawan.

"To maximize the opportunity, if they (DOT) will declare us best island in the world, we should also request that in all their marketing initiatives and in all their marketing campaigns, it should be indicated that Palawan is the best island destination in the world, so we can maximize the name," ani Board Member Winston Arzaga.

Tiwala naman ang Sangguniang Panlalawigan na magiging daan din ito para mabura ang negatibong imahe ng Palawan dala ng travel advisory noong Mayo.