Aabot sa 2,000 ang nagsalo-salo sa 1.3 toneladang gulay salad na inihanda sa La Trinidad, Benguet noong Huwebes, Hulyo 13.

Inani mismo ang mga gulay, tulad ng carrots, kamatis, repolyo, pipino, cauliflower mula sa Benguet. Nilagyan din ang higanteng gulay salad ng tatlong klase ng salad dressing.

Pinangunahan ng "League of Associations in the La Trinidad Trading Center" sa pakikipagtulungan ng isang pribadong culinary school sa Benguet ang paggawa ng higanteng vegetable salad.

Ayon kay Agusta Balanoy, pinuno ng Benguet Farmers' Marketing Cooperative, layunin ng aktibidad na maitaguyod ang lokal na produkto ng La Trinidad at mapalakas ang industriya ng turismo sa kanilang munisipyo.

“We want to tell the consumers na marami rin tayong gulay dito. May mga organic, may mga Good Agricultural Practices-certified din. So, it would be better kung sariling atin ang kanilang tangkilikin, hindi ang mga imported,” ani Balanoy.

Tumagal nang halos isang buwan ang mga paghahanda para sa nasabing aktibidad.

Bahagi rin ito ng Foundation Day celebration ng La Trinidad Trading Center.

-- Ulat ni Mae Cornes, ABS-CBN News