Tila nabigla ang komedyante't host na si Vhong Navarro nang tanungin ang 'di umanong nalalapit niyang kasal sa nobyang si Tanya Bautista.

"Hindi pa ikakasal pero nandoon kami. Mayroon akong plano na wala na akong ibang hahanapin pa kung hindi siya na lang. Kumbaga kung may gusto akong makasama hanggang kamatayan -- siyempre mauuna ako doon -- eh siya na 'yon. Pero 'di pa agad-agad, 'di pa nga ako nagpo-propose," ani Vhong nitong Lunes matapos siyang pumirma muli ng kontrata bilang isang Kapamilya.

Ayon kay Vhong, tulad niya ay nais din ni Tanya na magkaroon lamang ng simpleng wedding proposal.

"Ang intensyon mo lang ay malinis eh. Gusto mo lang ipakita sa kanya ay 'yung pagmamahal mo at handang-handa mo siyang pakasalan," dagdag ni Vhong.

Si Vhong ay naunang ikinasal sa dating aktres na si Bianca Lapus, ina ng kanyang dalawang anak na sila Bruno at Yce.

Noong 2008, ipinawalang bisa ng korte ang kasal nila Vhong at Bianca, 10 taon matapos silang maikasal.

Noong 2014, ipinakita ni Tanya ang pagmamahal at suporta kay Vhong sa isa sa pinakamadilim na bahagi ng kanyang buhay ng ito ay mabugbog ng grupo nila Cedric Lee at Deniece Cornejo.