Watch more in iWantv or TFC.tv

MANILA -- Nakilala si Marco Masa sa 2015 serye na "Nathaniel" bilang isang anghel na bumaba sa langit para sa isang misyon.

Pero sa tunay na buhay, tila siya ang may isang anghel na laging gumagabay sa kanya -- ang kanyang kapatid na may Down syndrome.

Kaya naman hindi napigilan ng batang aktor ang maiyak sa pagbibigay ng mensahe para sa kanyang Kuya Justine sa "Magandang Buhay" nitong Huwebes.

"Sobrang maalaga po siya. Halimbawa, si Papa may pinuntahan saglit o si Mama may ginagawa, siya po 'yung nagpapatulog sa akin. Siya po ang nagyaya sa akin kapag kakain na," kuwento ni Marco.

Ayon sa ina ni Marco na si Sol, ang makitang buo silang pamilya ang ikinasasaya ng kuya ni Marco.

Hindi naman napigilan ng batang aktor ang umiyak nang hingin ang mensahe para sa kapatid.

"Thank you kuya sa pag-aalaga mo sa akin kahit ganyan ka. Lagi mo akong ginagabayan tuwing may problema ako, lagi kang nandiyan sa tabi ko. Thank you," ani Marco habang umiiyak.

Hiling naman ni Marco para sa kanyang kaarawan ay ang magandang kalusugan at mahabang buhay para sa kanyang mga magulang at kuya.

Sa ngayon ay parte si Marco ng "Your Face Sounds Familiar Kids 2018" at "Goin' Bulilit."