MANILA - Nilinaw ng aktres na si Ria Atayde ang isyung nag-uugnay sa kanya at sa aktor na si Piolo Pascual.

Sa "Magandang Buhay" nitong Biyernes, iginiit ni Ria na hindi niya alam kung saan nag-ugat ang isyu.

Aniya, mabuting magkaibigan sila ni Piolo.

"Hindi ko nga alam, si Kuya Piolo naman 'yon, hello? Wala lang 'yon," ani Ria.

Matatandaang naging usap-usapan noong nakaraang buwan ang paghahawak-kamay nina Ria at Piolo sa "ASAP."

"Sobrang close naman talaga kami, hindi lang alam ng tao 'yon," ani Ria na iginiit na walang dahilan ang nangyari sa kanila sa "ASAP."

"Ang tawag niya sa akin, 'my Angel.' [Siya], my Kuya. So, my Kuya, my Angel, ganoon," paliwanag niya.

Sa nakaraang panayam, inamin ni Ria ang paghanga sa ilang Kapamilya actors kabilang na sina Piolo at John Lloyd Cruz.