Bagama't hindi pa lumalabas ang kapangyarihan ng karakter ni Kathryn Bernardo sa "La Luna Sangre," umani naman siya ng papuri sa kanyang pagsabak sa aksyon Miyerkoles ng gabi.

Dahil naipit siya sa gitna ng gubat, kinailangan ni Malia (Bernardo) na ipagtanggol ang sarili laban sa mga bampira sa pamamagitan ng paggamit ng malakas na instincts at kakaibang bilis.

Noong una'y puro iwas at takas lamang si Malia. Pero nang may isang hiker na nalagay sa panganib, hindi siya nagdalawang-isip na tulungan ito. Hinarap ni Malia ang limang bampira, na buong gabing sinuyod ang kagubatan sa paghahanap sa kanya.

Matapos ang pagharap sa mga bampira, napagpasyahan ni Malia na putulin ang kanyang buhok. Balak niyang ibahin ang kanyang hitsura para linlangin ang Supremo (Richard Gutierrez), at makapasok sa kampo ng mga bampira upang ipaghiganti ang kanyang pamilya.

Tutukan ang susunod na kaganapan sa "La Luna Sangre" tuwing Lunes hanggang Biyernes ng gabi pagkatapos ng "Ang Probinsyano."