Lumabas na ng rehabilitation center ang aktor na si Jirio Manio.

Matatandaang Hunyo 2015 nang makita si Jiro na pagala-gala sa Terminal 3 ng Ninoy Aquino International Airport.

Sa ulat ni Lolit Solis para sa Pilipino Star Ngayon, sinabi nitong hindi na magawang mapigilan pa ng center ang paglabas ng aktor dahil nasa tamang edad na ito.

Ayon sa pamunuan ng center nais na ng aktor na makasama ang kanyang pamilya sa Maynila.

Nangako 'di umano ang aktor na magbabagong buhay at iginiit na labas na ang aktres na si Ai Ai delas Alas, ang kanyang ina-inahan sa showbiz, sa kung anuman ang mangyayari sa kanya sa hinaharap.

Si Ai Ai ang boluntaryong tumulong na maipasok si Jiro sa rehab matapos niyang malaman ang insidente sa airport.

Matatandaang nitong Marso, sa ulat ng Pep ay inamin ni Ai Ai na nais na ng pamilya ni Jiro na makalabas na ito sa rehabilitation center.

Ayon kay Ai Ai, nagaalala siya sa maaring mangyari kay Jiro, kaya labag sa kanyang kaloobanna ilabas ito sa rehabilitation center.

Enero noong nakaraang taon ay nakalabas sa rehabilitation center si Jiro pero ibinalik din matapos ang ilang buwan.

Samantala, sa Facebook ng aktor ay isang larawan ang kanyang ibinahagi kung saan makikita ang bahagyang paglusog ng kanyang pangangatawan.