Puno ng ngiti, tawa, at pag-asa ang kasalang Cardo (Coco Martin) at Alyana (Yassi Pressman) nitong Lunes sa "Ang Probinsyano."

Matapos mapagpasyahang bumitiw na sa serbisyo, tinugunan na ni Cardo ang kanyang pangakong kasal kay Alyana.

Sa wakas, handa na siyang bigyang puwang ang kanyang kinabukasan kasama ang pinakamamahal niyang si Alyana.

Sa harap ng Diyos at ng kani-kanilang mahal sa buhay, nagpalitan ng matatamis na "I do" ang dalawa. Pareho silang puno ng pag-asang makakamit nila ang pinapangarap na katahimikan.

Pero sa gitna ng tawanan at palitan ng matatamis na salita, isang mapait na trahedya ang nagkukubli. Tinamnan ni Joaquin (Arjo Atayde) ng bomba ang bawat sulok ng simbahan.

Mabuti na lamang ay may mga tiga-CIDG sa kasalan. Agad nilang napigilan ang pagsabog, at nasagip ang kasalan.

Ngunit naging matagumpay man ang pagpigil nila sa bomba, mayroon pa ring nag-aantay na panganib sa labas ng simbahan.

Walang ideya si Cardo na ang tsuper pala ng kanyang bridal car ay ang taong matagal nang gustong tuldukan ang buhay niya.