(UPDATED) Inanunsiyo nitong Lunes ng ilang kompanya ng langis na magkakaroon ng bawas sa presyo ng kanilang mga produkto simula Martes, Hunyo 26.

Sa abiso ng ilang kompanya, nasa P1.15 ang itatapyas sa kada litro ng gasolina, P0.90 sa kada litro ng diesel, at P0.85 sa kada litro ng kerosene.

OIL PRICE ROLLBACK

SHELL, Flying V, Caltex, Petron (6 a.m., Martes)
GASOLINE -P1.15/L
DIESEL -P0.90/L
KEROSENE -P0.85/L

SEAOIL (12:01 a.m., Martes)
GASOLINE -P1.15/L
DIESEL -P0.90/L
KEROSENE -P0.85/L

PTT Philippines, TOTAL, Phoenix Petroleum, Eastern Petroleum (6 a.m., Martes)
GASOLINE -P1.15/L
DIESEL -P0.90/L

Posible namang matapyasan ulit sa susunod na linggo ang presyo ng petrolyo sa bansa, ayon kay Energy Assistant Secretary Bodie Pulido.

Ito ay matapos magpasya ang Organization of the Petroleum Exporting Countries (OPEC) noong nakaraang weekend na dagdagan ang produksiyon ng langis.

Watch more in iWantv or TFC.tv

PARE-PAREHONG GALAW

Ipinagtataka naman ng grupong Laban Konsyumer ang umano'y pare-parehong galaw sa presyo ng mga kompanya ng langis gayong iba-iba raw ang supplier at gastos nila sa operasyon.

"Hindi sila dapat pare-pareho ang kanilang rollback o increases. Iba-iba po ang uri ng mga negosyo nila," ani Laban Konsyumer President Vic Dimagiba.

Kaya pursigido ang Department of Energy (DOE) na ituloy ang "unbundling" o paghimay ng presyo ng petrolyo na tinututulan naman ng mga kompanya ng langis.

"Tuwing nangyayari iyong ganitong klase ng sitwasyon na pare-pareho iyong taas or pagbaba ng presyo ng petroleum products, naririnig natin iyong alegasyon na 'yan na posibleng may anti-competitive behavior," ani Pulido.

Nakatakdang ipresenta kay Energy Secretary Alfonso Cusi ang kautusan kaugnay sa "unbundling" dahil siya ang puwedeng mag-atas sa mga kompanya na ilabas ang kuwenta o basehan ng presyo ng petrolyo para matiyak na hindi naaabuso ang mga konsumer.

-- May ulat ni Alvin Elchico, ABS-CBN News