MAYNILA - Dumami ang lubak sa kalsada sa lungsod ng Maynila at sa karatig pang mga lugar sa Metro Manila dahil sa mga pag-ulan sa mga nakalipas na araw.

Apektado ang maraming pangunahing kalsada kabilang ang bahagi ng Taft Avenue, Quirino Avenue, Padre Burgos at Roxas Boulevard.

Iba-iba ang laki ng mga butas sa mga kalsada. Mayroon pang mga butas na malalim at magkakalapit.

Watch more in iWantv or TFC.tv

Delikado ang mga lubak sa kalsada sa mga motorista lalo na sa mga nagmomotorsiklo dahil maaari itong magdulot ng aksidente. Ito rin ay nagdudulot ng pagbagal sa daloy ng mga sasakyan na umiiwas sa mga lubak.

Maraming orange barriers na rin ang ipinakalat sa kahabaan ng Roxas Boulevard pero maraming orange cones ang natumba na.

Sa ibang mga kalsada gaya sa Pasay, Quezon City ay meron din mga potholes o mga lubak sa daan.

Sa social media post naman ni Metropolitan Manila Development Authority EDSA Traffic chief Bong Nebrija, sinabi niyang mag-ingat sa mga potholes sa EDSA. Wala aniyang magagawang pag-aayos hangga’g nandyan pa ang habagat.

- TeleRadyo 27 Hulyo 2021