Nahuli ng mga pulis ang limang tao na itinuturong sangkot sa ilegal na pagsusugal na tinatawag na pusoy sa Cainta, Rizal.

Alas sais y media ng gabi noong Lunes, nakatanggap ng tawag ang mga pulis dahil sa reklamong maingay ang ilang nagsusugal sa Brgy. San Andres, Cainta Rizal.

Nagsagawa muna ng surveillance ang mga pulis at nang makumpirma na may ilegal na nagsusugal sa lugar ay hinuli nila ang limang tao.

May dalawang nakatakas at pinaghahanap ngayon ng mga pulis.

Ayon sa hepe ng Cainta Police Station na si Police Major Alfonso Saligumba III, medyo masikip ang daan sa lugar at naging hamon sa mga pulis sa paghuli sa mga sangkot.

Narekober ang mga baraha at pera na nagkakahalaga ng halos 800 pesos na hinihinalang ginamit sa pagsusugal.

Ang limang nahuli ay nakakulong ngayon sa Cainta Police Station at nakatakdang kasuhan ng paglabag sa Presidential Decree 1602 o ang Anti-Illegal Gambling Law.