MAYNILA — Ipinatitigil muna ang pag-aalaga ng baboy sa M'Lang, North Cotabato dahil sa banta ng African swine fever.

Ayon kay M'lang municipal agriculturist Arlene Encarnacion, hanggang Hunyo 15 na lang ang pag-aalaga ng baboy sa bayan base sa inilabas na ordinansa ng lokal na pamahalaan.

"After ng June 15, wala muna kaming baboy. Mag-disinfect muna kami," aniya sa panayam sa TeleRadyo Miyerkoles.

Isasagawa ang repopulation ng mga baboy hanggang wala ng maitalang kaso ng ASF.

• Agri dept sets aside P300 million for lending to hog raisers in 'green zones'

Sabi ni Encarnacion, nagbigay na ang M'lang LGU ng nasa P15 milyon na bayad-pinsala para sa mga magbababoy na apektado ng ASF.

Higit 3,800 hog raisers ang apektado sa bayan.

Magbibigay rin aniya ang Department of Agriculture na livelihood assistance.

"Mag-venture muna tayo sa ibang mga pangkabuhayan sa bayan ng M'lang kasi malulugi rin tayo kapag ipipilit na magbuhay tayo ng mga animals natin na puwedeng ma-contaminate ng mga virus," sabi ni Encarnacion.