Simula ngayong araw ay mas maraming pasahero na ang sabay sabay na puwedeng makasakay sa mga bagon ng tren, kasunod ng pagpapatupad ng 100% passenger seating capacity sa MRT-3 at iba pang pampublikong transportasyon.

Katumbas ng 100% capacity ang 394 na pasahero kada bagon o 1,182 na pasahero kada train set dito sa MRT 3.

Hindi maiwasang mangamba ng ilang mga pasahero pero iginiit nila na suportado naman nila ang bagong patakaran para na rin sa mga kababayan natin na kinakailangan magtrabaho.

Doble ingat na lang aniya sila at susunod sa safety protocols para maiwasan makakuha ng covid-19.

Ayon sa pamunuan ng MRT, mahigpit pa ring ipatutupad ang minimum public health standards sa buong linya ng MRT-3, kabilang ang pagbabawal sa pagsasalita, pagkain, pag-inom, at pagsagot sa telepono sa loob ng mga tren.

Kinakailangan ding magsuot ng facemask ng mga pasahero. Maaari na sumakay maging ang mga hindi bakunado, bata man o matanda basta magsusulat lang sila ng kanilang mga personal details sa contact tracing logbook ng station.