Timbog ang isang miyembro ng Police Security and Protection Group matapos mahuling gumagamit ng nakaw na sasakyan sa Calamba, Laguna.

Batay sa paunang impormasyon mula sa Integrity Monitoring and Surveillance Group Region 4-a, may ranggo na Police Chief Master Sergeant ang aktibong pulis na kanilang inaresto.

Nakatanggap muna sila ng impormasyon na gumagamit ng nakaw na sasakyan ang pulis. Dun sila nagkasa ng joint operation kasama ang PNP Highway Patrol Group, kung saang nahuli sa akto ang pulis na minamaneho ang isang silver na AUV.

Napag-alaman sa database ng HPG na unang naiulat na nawala ang nasabing sasakyan sa Scout Borromeo, Barangay South Triangle Quezon City noong 2012. Bukod pa sa nakaw ang sasakyan, maling plaka rin ang nakalagay dito.

Hiningan ng mga kaukulang dokumento ang pulis bilang patunay na binili niya ang sasakyan sa ibang tao pero wala siyang naipakita.

Muling pinaaalahanan ng IMEG ang lahat ng pulis na mahigpit na ipinagbabawal ang paggamit o pagbenta ng mga nakaw na sasakyan, o kayay mga sasakyan na nakumpiska o narecover mula sa isang operasyon.

Mahaharap sa kasong kriminal at administratibo ang nasabing pulis.