MAYNILA - Umapela ng tulong pang-puhunan ang isa sa mga natenggang tsuper ng pampasaherong jeepney bunsod ng pandemyang dulot ng COVID-19.

“Kahit papaano po, pagkakakitaan ko kahit po pagtitinda lang ng fish ball….sisipagan na lang ang pagtitinda,” ayon kay Rodel Roldan.

Sa panayam sa TeleRadyo Martes ng umaga, sinabi ni Roldan na sa ngayon ay patuloy siyang namamalimos sa kalsada para may pangtustos sa pangangailangan ng kaniyang pamilya at 3 anak na pawang nag-aaral pa.

Kuwento niya, naghanap naman siya ng ibang mapapasukan nang hindi pa payagan ang kanilang ruta na muling makabiyahe.

“Kaya lang, napakahirap maghanap. Ang daming requirements hinahanap sa akin gaya ng rapid test, swab test, na wala naman po akong sapat na pambayad,” sabi niya.

Masaklap pa aniya, naaksidente siya matapos na mahulog sa truck.

“Sana po nakabiyahe na ako kaya lang naaksidente ako noong huling buwan. Nalaglag po ako sa truck, sa kagustuhan kong madagdagan kinita ko, sumabit po ako sa truck. Sa kasamaang palad po nakabitaw ako,” sabi niya.

May dalawang dekada nang tsuper ng pampasaherong jeepney si Roldan na ang ruta ay Sangandaan-Divisoria.

“Hanggang ngayon ‘di na ako makatrabaho dahil masakit pa rin. Buti nga po ‘di ako nagulungan,” sabi niya.

- TeleRadyo 16 Pebrero 2021