Kasalukuyang nangunguna si NorthPort guard Stanley Pringle sa statistical race para sa 2017-18 PBA Most Valuable Player award, ayon sa inilabas na report ng liga ngayong Huwebes.

May average na 35.5 statistical points si Pringle sa pagtatapos ng season, habang 33.1 SPs naman ang naitala ni San Miguel Beer center June Mar Fajardo, ang naghaharing MVP.

Lamang sana si Fajardo sa nasabing talaan kung hindi ito na-injure sa umpisa ng Governors' Cup. Hinahabol ngayon ni Fajardo ang ika-limang sunod na MVP award.

Sa Enero 13 sa Philippine Arena sa Bulacan gaganapin ang PBA Leo Awards, kasabay ang pagbubukas ng ika-43 season ng liga.

Pangatlo sa listahan si Japeth Aguilar ng Barangay Ginebra (32.3 SPs), Sean Anthony ng NorthPort (31.3), at Matthew Wright ng Phoenix (30.0).

Ang magkakakamping Beermen na sina Marcio Lassiter, Arwind Santos at Alex Cabagnot, kasama sina Scottie Thompson ng Ginebra at Poi Erram ng Blackwater ang kumukompleto ng top 10.

Samantala, malaki ang tsansa ni Jason Perkins ng Phoenix na makopo niya ang rookie of the year award.

May 32.2 SPs si Perkins, malayo sa 18.7 SPs ng kasunod nitong si Jeron Teng ng Alaska.

Hindi nag-qualify sina Christian Standhardinger ng San Miguel at Kiefer Ravena ng NLEX, dahil hindi sila umabot sa quota ng games played.

No. 1 pick si Standhardinger noong 2017 draft, habang No.2 naman si Ravena.

For more sports coverage, visit the ABS-CBN Sports website.